بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں, بیرسٹر ڈاکٹر سیف
بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں, بیرسٹر ڈاکٹر سیف
پشاور:وزیر اعلیٰ خیبر پختونخوا کے مشیر اطلاعات و تعلقات عامہ بیرسٹر ڈاکٹر سیف نے کہا ہے کہ بعض مسترد شدہ سیاسی ڈرامے باز بنوں واقعہ پر سیاست کی ناکام کوشش کر رہے ہیں تاہم انتشار کی سیاست کرنے والوں کے منفی عزائم سے عوام بخوبی باخبر ہیں، وزیر اعلیٰ خیبرپختونخوا علی امین گنڈا پور بنوں کی صورتحال کو مسلسل مانیٹر کر رہے ہیں۔ان خیالات کا اظہار انہوں نے یہاں سے جاری اپنے ایک بیان میں کیا۔انہوں نے کہا کہ واقعہ کے فوری بعد وزیراعلیٰ نے تمام مصروفیات چھوڑکر بنوں کے معاملات پر توجہ دی ہوئی ہے۔ بیرسٹر ڈاکٹرسیف نے کہا کہ بنوں میں کسی بڑے ناخوشگوار واقعہ کی روک تھام صوبائی حکومت کی اولین ترجیح ہے۔مشیر اطلاعات نے کہا کہ مقامی انتظامیہ اور سماجی عمائدین پر مشتمل کمیٹی کے مذاکرات چل رہے ہیں،: مذاکرات کا عمل شروع ہوتے ہی بنوں میں امن بحال ہوا،سماجی عمائدین اور انتظامیہ پر مشتمل کمیٹی علاقے میں دیر پا قیام امن کو یقینی بنائے گی۔انہوں نے کہا کہ بنوں انتظامیہ مسلسل وزیر اعلیٰ کو حالات سے آگاہ کررہی ہے اور اس حوالے سے سماجی عمائدین پر مشتمل کمیٹی کی جلد وزیر اعلیٰ سے ملاقات بھی متوقع ہے۔ بیرسٹر ڈاکٹرسیف نے کہا کہ وزیر اعلیٰ کی ہدایت پر قائم کمیشن بہت جلد واقعہ کے حوالے سے انکوائری رپورٹ جمع کرے گا۔مشیر اطلاعات بیرسٹر سیف نے کہا کہ خیبرپختونخوا دہشتگردی سے پہلے ہی کافی متاثر ہے اب اور کسی بھی بڑے سانحے کا متحمل نہیں ہو سکتا، عوام کی جان و مال کی حفاظت صوبائی حکومت کی اولین ترجیحات میں شامل ہے، عوام شدت پسندی کے خاتمے کے لیے صوبائی حکومت اور مقامی انتظامیہ سے تعاون کریں۔
About The Author
